Aarav aur Ishita dono Indore mein padhai ke liye rehte hain, par alag-alag colleges mein. Dono ka apna routine hai, apni duniya hai, par kismat ne ek din unhe ek chhoti si mulaqat mein la khada kiya, jisse yeh kahani shuru hoti hai.

Ek din Ishita black dress pehen ke market jaati hai, aur Aarav bhi wahi hota hai. Achanak zor se baarish shuru ho jaati hai, aur sab log sochne lagte hain, "Ab kahaan jaayein, kya karein?" Aarav ek shop ke neeche jaakar ruk jaata hai, jahan baarish se bacha ja sake. Aur kuch hi seconds mein, Ishita bhi wahi aa jaati hai, apni dadi ke saath.

Ishita ki dadi thodi si chidchidi hokar bolti hain, "Yeh kya baarish! Aise beech mein shuru ho gayi. Main toh kal hi keh rahi thi na, kal jaate hain, aaj nahi aate. Par tum meri baat kab sunti ho?"

Ishita thoda sa muskurate hue jawab deti hai, "Dadi, aap hi toh bol rahi thi bore ho raha hai, aaj hi chalo!"

Yeh sab Aarav wahi khada sun raha tha, aur chupke se Ishita ko dekh bhi raha tha.

Kuch der baad baarish ruk jaati hai, aur sab log apne-apne raaste nikalne lagte hain. Par Ishita ki gaadi start nahi hoti. Woh try karti rehti hai, par gaadi hai ki sunti hi nahi. Aarav apni bike ke paas jaata hai aur check karta hai ki uski bike toh theek hai. Par Ishita ki gaadi ab bhi band padi hai.

Ishita ki dadi bolti hain, "Kisi se help maang na, agar nahi ho rahi start!"

Ishita jawab deti hai, "Dadi, baarish ki wajah se nahi ho rahi hogi. Dekh rahi hoon main!"

Itne mein Aarav ko ek call aata hai, aur woh side mein baat karne lagta hai. Dadi phir bolti hain, "Jaldi help maang, nahi toh baarish phir shuru ho jaayegi!"

Tab dadi Aarav ko bula leti hain. Aarav apna WhatsApp call hold karke aata hai. Ishita usko batati hai, "Gaadi start nahi ho rahi, kya aap dekh sakte hain?"

Aarav try karta hai. Pehle toh gaadi nahi chalti, par thodi der baad woh start ho jaati hai.

Ishita khushi se bolti hai, "Thank you so much!"

Dadi bhi muskurate hue kehti hain, "Dhanyawad, beta!"

Aarav "Welcome" bolke wahan se chala jaata hai, aur Ishita bhi apna kaam nipta ke dadi ke saath ghar chali jaati hai.

Ghar pe Ishita aur dadi baatein karte hain:

"Kitna bad luck tha aaj, Dadi! Time pe baarish shuru, aur gaadi bhi band pad gayi!"

Dadi bolti hain, "Haan, par accha hua us ladke ne help kar di, nahi toh pata nahi kitna time lagta gaadi start hone mein."

Ishita bas "Haan" bolke chup ho jaati hai.

Idhar Aarav ka dil Ishita ke baare mein soch-soch ke pagal ho raha tha. Woh apne mann mein bolta hai, "Yeh ladki itni cute kyun thi? Par kya pata uska boyfriend ho? Dekhne mein toh badi sanskaari lagi, par main kyun iske baare mein itna soch raha hoon? Main toh usko jaanta bhi nahi!"

Ishita idhar fresh hokar apni books khol ke padhne baith jaati hai, aur Aarav apne doston ke saath bahar chala jaata hai.

Doston ke saath baatein chalti hain, aur topic boyfriend-girlfriend pe chala jaata hai. Sab Aarav ki taraf dekhne lagte hain aur bolte hain:

"Bhai, tu tab se kahaan khoya hua hai? Dhyan kahin aur hi hai!"

Aarav thodi si smile ke saath bolta hai, "Arre, kuch nahi, ek ladki market mein dikhi. Uski gaadi band ho gayi thi, toh uski dadi ke kehne pe maine help ki. Aur woh ladki itni cute thi ki dimaag se nikal hi nahi rahi!"

Dost log mazaak udate hain:

"Arre bapre! Finally Aarav ko koi pasand aayi! Btw, itni pasand hai toh uska naam pata kiya? Kahaan rehti hai, kya karti hai, kuch idea?"

Aarav bolta hai, "Arre, bas gaadi start ki thi, ghar tak chhodne thodi na gaya tha jo itni jaldi sab pata chal jaaye! Tum baitho, main abhi nikalta hoon."

Aur Aarav ghar chala jaata hai.

Agli subah, Ishita 9 baje mandir jaati hai, aur Aarav so ke uthta hai. Ishita mandir se aake apni friend ke saath college nikal jaati hai, aur Aarav bhi apne dost ke saath college chala jaata hai.

Ab yahaan ek bada twist aata hai! Aarav ke ek dost ki girlfriend Ishita ke college mein padhti hai. Woh Aarav ko apni girlfriend se milwane le jaata hai. Dono college ke gate pe rukte hain.

Tabhi wahan se dost ki girlfriend aur Ishita aati hain. Ishita black jeans aur pink top mein hoti hai, aur ekdum cute lag rahi hoti hai. Aarav usko dekh ke shock ho jaata hai:

"Yeh yahaan kaise?!"

Dost bolta hai, "Arre, yeh meri girlfriend hai! Aise kyun react kar raha hai jaise tujhe pata hi nahi?"

Aarav bolta hai, "Arre, teri girlfriend nahi, woh baju wali ladki! Wahi market mein mili thi kal!"

Dost Ishita ko dekh ke bolta hai, "Bapre, bohot hi zyada cute hai! Lagta nahi tha teri choice itni zabardast hogi. Par mujhe nahi lagta usko koi aisa-vaisa pasand aayega. Dekh ke toh bohot sanskaari lagti hai."

Aarav bolta hai, "Yahi simplicity dekh ke toh attraction ho rahi hai. Par mujhe nahi lagta usse baat karne ki kabhi himmat hogi."

Dost usko thodi hawa deta hai, "Tune jabhi try nahi kiya, toh propose kaise karega? Ek baar normal baat kar, dosti kar!"

Aarav thodi si attitude ke saath bolta hai, "Jaise maine aaj tak propose nahi kiya, waise hi iske aage bhi nahi karunga. Aur tu mujhe suggestion de raha hai? Tera khud ka relationship meri wajah se shuru hua hai, ab tu mujhe sikhayega?"

Ishita ka dhyan Aarav ki taraf bilkul nahi jaata. Woh bas apni friend ke saath baatein karte hue parking ki taraf chalti hai. Parking se gaadi nikalti hai, aur woh log nikal jaate hain.

Raaste mein Ishita ki friend bolti hai, "Yaar, bohot din ho gaye, hum kahin gaye nahi. Coffee shop chalen?"

Ishita jawab deti hai, "Nahi yaar, ghar mein bohot kaam hai, studies bhi pending hain. Aaj nahi."

Friend usko chidhati hai, "Kitna jhooth bolti hai! Tere ghar mein har kaam ke liye maid hai, aur tujhe kaunsa itna kaam aaya? Bas bahaane banana band kar!"

Ishita thodi si irritate hokar bolti hai, "Mera mood nahi hai, kal chalen, please."

Par friend nahi maanti, "Ishita, please yaar, aaj sab ready hain. Kal ka kya pata? Aaj chal, bas!"

Ishita finally maan jaati hai, "Theek hai," aur sab log coffee shop ke liye nikal padte hain.

Idhar Aarav ka dost apni girlfriend ke saath baat kar raha hota hai aur Aarav ko bolta hai, "Chal, hum bhi nikalte hain."

Aarav apne dost ke saath bike pe coffee shop ki taraf jaata hai. Par raste mein ek chhota sa accident ho jaata hai. Aarav ka haath thoda sa lag jaata hai. Woh gusse mein wrong side se aaye ladke ko rokta hai aur apne dost ko uthane jaata hai, jo gir gaya tha.

Accident dekh ke coffee shop se sab log bahar daud ke aate hain, Ishita bhi unmein shamil hoti hai. Aarav apne dost ko side mein bithata hai, usko paani deta hai, aur bike utha ke baju mein khadi kar deta hai.

Ishita door se dekhti hai, par Aarav ka chehra usko theek se nahi dikhta. Jab Aarav apni bike ke paas jaata hai, tab uska chehra clear hota hai. Ishita ko ekdum yaad aata hai, "Arre, yeh toh wahi ladka hai jisne kal gaadi start karke di thi!"

Ishita ki friend usko dekhte hue bolti hai, "Kaun? Jo gir gaya hai ya woh jo apne dost ki care kar raha hai? Aur tu isko kaise jaanti hai?"

Ishita sab kuch batati hai—kal market mein kya hua, kaise baarish mein gaadi band ho gayi thi, aur kaise Aarav ne help ki thi.

Friend bolti hai, "Arre, toh tujhe bhi uski help karni chahiye!"

Ishita bolti hai, "Par usko kahaan kuch laga hai? Uska dost gir gaya hai, aur woh uski care kar raha hai. Main kaise jaungi? Waise bhi, pehchaan nahi hai, aur zarurat na hote hue beech mein jaana accha nahi lagta."

Friend bolti hai, "Haan, yeh bhi theek hai. Chalo, coffee pi ke nikal jaate hain."

Par tabhi scene mein ek naya twist aata hai. Woh wrong side wala ladka gusse mein chillata hai aur Aarav se paise maangta hai. Sab log ruk ke dekhte hain ki kya ho raha hai.

Aarav bolta hai, "Tum wrong side se aaye aur gaadi ka nuksaan hua, toh main kyun paise doon?"

Uska dost kehta hai ki uski bike ka koi bada nuksaan nahi hua, par thodi si chot lagi hai. Woh ladka sunta nahi aur apne ek dost ko bula laata hai. Dono dhamki dene lagte hain, "Paise diye bina jaane nahi denge!"